LAOAG CITY – Inlawlawag ni Mayor Edmar Vincent Bonoan iti ili ti San Nicolas a ti supplemental Budget a kalikagom na nga aprubaran ti Sang Bayan ket saan a para iti bukodna nga interes no diket para iti nasao nga ili.
Kunana a ti 7 a milyon a pisos ket para iti pannakagabur, pannaka-ikonektar ti kuryente ken pannakaestablisar ti Comfort room iti lote a ginatang ti lokal a gobierno ken isu met ti nakautangan da.
Masdaaw ti mayor no apay nga iti pannakaiyimplementar daytoy ket isut met ti kaado ti saludsud ti konseho idinto naaprubaranen ngem nagbaliw laeng ti klasipikasyon na.
Kuna na a no ti saludsud da ket dagiti clearance manipod iti Department of Agrarian reform ket awan ti mabalbaliwan no di ket mabalin latta a maparaepan ti lote ngem kasapulan laeng a magaburan gapu ta isu ti pakaipanan ti pagperyaan.
Naamoan a sumagmamano pay a paset ti nasao a lote ket nagbalin a demo Farm, a daytoy ket tapnu adda ti usar na ken adda ti mapastrek ti lokal a gobierno tapnp adda ti nayun a pagbayad iti utang ti nasao nga ili.
Inbatadna a no daytoy ket maysa nga investment, masapol met nga adda ti pagsapulan na.
Kabayatanna, patien ni Bonoan a possible a daytoy a panangkwestyunar ti konseho iti supplemental budget ket adda ti maris politika na.
Inpetteng na a masapol nga isardeng koman ti agpulpulitika gapu ta addan to manen ti oras ken panawen para iti daytoy.
