LAOAG CITY – Inlawlawag ni Mayor James Bryan Alcid a saan a kasapulan dagiti mangidadaulo ti nagduduma a pangopisinaan ti gobierno lokal ditoy ciudad ti Laoag ti agkiddaw ti mayor’s approval sakbay da a mangiparuk at ti impormasyon iti publiko pakaseknan kadagiti isaysayangkat da a nagduduma a programa ken aktibidad.
Kuna ti mayor a ti maysa kadagiti itantandudo ti administration na ket ti panagbalin a transparent iti publiko.
Inbatad na a no aniaman nga opisina ti city government ti makaipaay ti impormasyon wenno makasungbat kadagiti isyu ket rumbeng nga agsungbat a saanen a kasapulan a kiddawen ti pammalubos na.
Mainaig iti daytoy, inrakurak ti mayor a nakitaripnong kadagiti department heads iti kallabes ken inbilin na nga iyimplementar dagiti nabatbati pay a programa ken aktibidad ita a tawen.
Innayon na nga aniaman ti magun-od a balligi ti city government ket maibilang a balligi ti sibubukel na saan laeng nga isuna kas ama ti ciudad isut gapu na a kasapulan ti panagtitinnulong da.
Reaksyon daytoy ti mayor kalpasan a saan a kinayat ni Mr. Clinthon Ulep, ti mangidadaulo ti General Services Office ti nangipaay ti aniaman nga impormasyon mainaig iti ar-aramiden ti city government a panagdalos da iti tiendaan ken kuna na a masapol a dumawat paylaeng nga umuna ti mayor’s approval dagiti kameng ti media.
