LAOAG CITY – Naduktalan ti gobierno lokal ditoy ciudad ti Laoag nga adda dagiti paset ti tiendaan a marebrebba wenno agtintinnag ti semento na, ken makita payen dagiti landok ti nasao nga establisimiento.
Daytoy ti inbatad ni Mayor James Bryan Alcid kalpasan ti pannakaisayangkat ti ocular inspections iti Laoag City Public Market and Commercial Complex.
Kadwa ti mayor a nagturong iti merkado publiko dagiti kameng ti City Engineering Office.
Inpakaammo ni Alcid a kalpasan ti ocular inspection ket makikoordinar da a dagus iti Department of Public Works and Highways para iti pannakarebisar ti pasdek, ken mang-hire da ti third party a mangiwayat ti retrofitting nga isu met ti manganalisar no kasano ti pannaka-renovate wenno pannakasalbar daytoy.
Innayon ti Mayor a no maipapan iti pondo a mausar ket nakadepende iti Department of Public Works and Highways no kasanu iti kalawa ken kadakkel ti matarimaan iti tiendaan ditoy ciudad ti Laoag.
Kuna na a no kabaelan ti pondo ti City Government ket isu ti pangalaan da ngem no saan ket agkiddaw da ti tulong ti Department of Public Works and Highways ken ti congressional office.
Mainaig iti daytoy, kalikagom ni Mayor Alcid nga iti kabiitan a panawen ket ma-renovate ti tiendaan gapu ta no adda ti mapasaran a didigra ket possible a mangitunda ti naan-anay a pannakadadael ti pasdek ken adda dagiti madangran.
