LAOAG CITY – Inpakaammo ni Mayor Richard Degala a kataripnongna dagiti tricycle drivers iti ili ti Vintar tapno mapagsasaritaan ti maipaay a tulong kadakuada.
Segun kenkuana, babaen iti daytoy ket maammoanda no ania dagiti kiddaw a kalikagum dagiti maseknan a drivers.
Inbatadna a maipaay a nasapsapa ti financial assistance para kadakuada iti umuna wenno maikadua a lawas ti Abril.
Inlawlawagna a masapul a maipangato ti plete dagiti tricycle gapu iti agtultuloy a panagngato ti presio dagiti produkto a petrolyo.
Inpettengna nga awan ti serserbina iti panagpasada dagiti tricycle drivers gapu ta arig awanen ti maiyawidda para iti pamiliada.
Gapu iti daytoy, kalikagum ni Mayor Degala a maipaay nga insigida dagiti kasapulan a tulong dagiti nasao a drivers tapno maalay-ayan ti kinarigat a mapaspasaranda iti agdama.
Innayonna a naikeddeng nga umawat ti financial assistance dagiti nasao a drivers manipud iti Provincial Government of Ilocos Norte inton bigat, Marso 18.
