LAOAG CITY – Nagsisinnungbat da Mayor Edmar Vincent Bonoan ken dagiti sumagmamano a kameng ti konseho iti ili ti San Nicolas kabayatan ti special session gapu iti isyu ti panagpagabor iti lote ti gobierno lokal iti nasao nga ili.
Ti lote ket pakaipatakderan koma ti government center iti ili ti San Nicolas.
Nupay kasta, saan a kayat ti kaadoan a kameng ti konseho ti kalikagom ti mayor gapu ta ti kayatda ket maiconvert nga umuna manipod agriculture mapagbalin a commercial.
Inkalintegan met ti mayor nga awan ti mabaliwan gapu ta pakaipakabilan laeng dagiti peryaan ngem saan latta nga inanamongan ti kaadoan a kameng ti konseho iti ili ti San Nicolas.
Karaman kadagiti nangkwestyunar iti kalikagom ti mayor ket ni Konsehal Luciano Caraang gapu ta kayatna nga ayaban nga umuna ti Department of Agrarian Reform tapno iyuman nga umuna daytoy a banag idinto a kanunungan met ni Konsehal Joy Galing ti kalikagom ni Mayor Bonoan.
Kabayatanna, awan ti nagpinalan ti saritaan da maipanggep iti nasao a banag isut gapuna a matratar manen daytoy iti sumaruno a sesyon iti konseho iti ili ti San Nicolas.
