LAOAG CITY – Posible a maaddaan ti koordinasyon ti kapitolio probinsial ken iti lokal a gobierno iti ili ti San Nicolas para iti ad-ado a bilang ti iskolar.
Daytoy ti inpasingked ni Mayor-elect Domingo Ambrocio iti nasao nga ili.
Segun ken ni Ambrocio, kalikagum na a saan laeng a dagiti nasirib ti agbalin a benepisyaryo ti scholarship ngem ketdi uray dagiti nagaget nga agbasa.
Inbatad na a gapu iti daytoy ket plano na a maikkan ti ad-ado ta pondo ti scholarship program iti ili ti San Nicolas apaman a pormal a makapagtugaw kas mayor iti lugar na.
Kuna na a nu adda man ti pagkurangan ti pondo ket dita nga iyuman na iti gobernador ken maaddaan dagitoy ti koordinasyon para iti pannakatulong iti ad-ado a bilang dagiti agad-adal.
Immunan nga inbatad ni Ambrocio nga ado ti iskolar iti probinsya ken kalikagum na pay a manayunan daytoy nangruna iti ili ti San Nicolas.
