LAOAG CITY – Kalikagom ni Mayor- Elect James Bryan Alcid a matarimaan ken maiplastar a nasayaat iti merkado publiko ditoy ciudad ti Laoag.
Daytoy ket kalpasan a nakita nga aglatlatin dagiti columns ken beams iti umuna a kadsaaran iti merkado publiko ditoy ciudad gapu ta ti wet section ket adda iti maikadwa a kadsaaran.
Mainiag iti daytoy, kuna ni Alcid nga addan ti immuna a pannakisaritana iti City Engineering Office ken inbalakad na a kitaen da a naimbag no ania ti kasayaatan a maaramid.
Inbatad na pay a mangkitada iti expert tapno ipaadal no ania iti rumbeng a maraamid ken no mabalin a mai-retrofit ti columns ken beams na tapno masalbar ti merkado publiko.
Inlawlawag na a dagitoy ti plano da nga aramiden ken saan a ma-demolish ti merkado publiko no di ket matarimaan ken maiplastar laeng a nasayaat.
Immuna iti daytoy, adda dagiti sayangguseng iti kallabes a no ni Mayor-elect Alcid ti agtugaw kas mayor ditoy ciudad ti Laoag ket maipagarop nga iparebba na ti nasao a merkado publiko.
