LAOAG CITY – Saan a nagliway ni Mayor Fritzie dela Cruz Gapazin iti ili ti Bacarra iti panangipalagip kadagiti opisyal ti barangay iti Brgy. 16 no sadino a naangay ti maysa a pasken.
Inpalubos na iti pannakaangay ti pasken ngem nasken iti pannakasurot dagiti health protocols kas iti social distancing, limitado dagiti makipaset nga agpatingga iti 100 a tattao ken dadduma pay a pagalagadan.
Segun kenni Gapazin, nagkiddaw dagiti nagpasken a maaddaan ti liveband ket dita a napatgan kalpasan a naiyuman na iti Philippine National Police.
Daytoy ket mainaig iti pannakaipawil kadagiti videoke ken dadduma a nariringgor.
Inlawlawag ti mayor a ti naibaga ti hepe ket awan pay ti ordinansa iti ili seknan iti nasao banag rason nga awan ti naipatungpal a linteg.
Gapu iti daytoy, inikkan ni Gapazin iti dua nga oras para iti live band.
Inadmitir ni Gapazin a saan na a nakita ti actual a panagpasken dagiti maseknan ngem responsibilidad dagiti kameng ti Barangay Health Emergency Response Team ti mangkita iti pannakasalungasing dagiti health protocols.
Innayon na a pinalagipan na manen dagiti opisyal ti barangay kabayatan ti taripnong gapu ta saan a magabenan a bantayan dagiti kameng ti PNP, dagiti opisyal iti munisipyo ken uray isuna a mayor a mangkita kadagiti mapaspasamak iti ili da.
Awan met pay ti naipadanun a reklamo iti opisina ti mayor rason nga awan pay ti naiyuswat nga imbestigasyon.
Immunan nga inadmitir ni Barangay Chairman Julius Ramones iti nasao a barangay a nagsalungasing da ti linteg mainaig iti naangay a pasken.
