LAOAG CITY – Maladingitan ni Mayor Aldrin Garvida iti ili ti Nueva Era gapu ta nakairekord da ti kaunaan a kaso ti covid-19 iti baet nga ar-aramiden da amin a kabaean da tapno mapagtalinaed koma a covid-19 free iti nasao nga ili.
Inlawlawag na a ni IN-C116 a taga Barangay Ugis iti nasao nga ili ket naggapo idiay Pasig City idi Setyembre 22 ita a tawen.
Iti agdama ket adda ni IN-C116 iti barangay isolation facilty gapu ta asymptomic daytoy.
Inpakaammo ti mayor a ti midwife ken driver ti ambulanysa a napan nangsukon iti pasyente ket karaman a naka-quarantine iti agdama.
Innayon ni Mayor Garvida nga uray ti pamilya ti pasyente ket kinasarita da nga ag-home quarantine met dagitoy uray saan da a naasitgan ni IN-C116.
Inpakaammo ti mayor a no agtultuloy nga awan ti marikna a sintomas ni IN-C116 iti uneg ti 10 agingga iti 14 nga aldaw ket inbaga ti doktor a saanen a kasapulan a dumalan manen iti swab test ngem ketdi maikkan to laengen ti clearance nga agawid iti pamilya na.
Mainaig iti daytoy, inbaga ni Mayor Garvida a sakbay a nagawid ditoy probinsya ni IN-C116 ket dimmalan iti swab test idi Agosto 16 ket negatibo ti resulta na, ngem idi Setyembre 16 ket nagparapid test ket nagpositibo daytoy ngem saanna nga inbaga ti nasao nga impormasyon.
Nupay kasta, iti panagpositibo ni IN-C116 ti swab test ket isu laengen ti panangipudno na a positibo ti rapid test na idi Setyembre 16.
Kuna ti mayor a ti atapen da ket idi naamoan ni IN-C116 a positibo ti rapid test ket isu metten ti panagdesisyo na nga agawid ditoy probinsya tapno no bilang agpositibo ti covid-19 ket adda iti mismo nga ili da wenno sidong ti pamilya na.
Innayon na a maawatan da ti sitwasyon ni IN-C116 gapu ta narigat ti agtalinaed idiay Metro Manila kangrunaan na iti daytoy a panawen ngem masapol a saan koman a maulit ti kastoy ken maibaga amin nga impormasyon.
Kabayatanna, inpakaammo ni Mayor Garvida a naiget ti panagbantay dagiti otoridad a pakairamanan ti augmentation team manipod probinsya iti border ti Nueva Era ken Abra no sadinno nga uray isuna ket arigna binigat a mapan bumisita iti lugar.
Segun pay ti mayor, silulukat latta ti ili da kadagiti taga Abra a mapan iti ili da basta kompleto ti dokumento dagiti maseknan.
