LAOAG CITY – Maragsakan ni Mayor Gina Guillen iti panagkampeon iti ili ti Piddig iti naisayangkat a Tan-ok ni Ilocano Festival of Festivals.
Segun iti Mayor, saanna a ninamnama nga isuda ti agballigi iti nasao a naindaklan nga aktibidad ti probinsia gapu ta ammona nga amin nga ili ken siudad ket naiget a nagsagana ken awan ti kayatna nga agpaudi.
Inbatadna a daytoy a panagkampeonda ket kasapulan a maitultuloy gapu ta dakkel daytoy a pakaidayawan iti ilida.
Inlawlawagna nga addan iti pannakisarsaritana ken ni Mr. Robert Benitoy, Municipal Tourism Officer iti ili ti Piddig tapno maplano a naimbag no pangipananda ti naawatda a premio a maysa a milyon a pisos.
Inpasingkedna a rumbeng laeng a maipaayan dagiti performer nga adda iti likudan ti naisangsangayan a panagballigida.
Maipalagip nga inrakurak ti Municipal Tourism Officer nga ita a tawen ket nangilatang ti lokal a gobierno ti 2.6 milyon a pisos para iti amin a kasapulan ti panangbukel ti entry iti ili ti Piddig manipud iti taraon, costume, props ken dadduma pay.
Kabayatanna, saan laeng a ti kampeonato ti nagun-od iti ili ti Piddig no di ket pakairamanan pay dagiti dua a major award a Best in Production Design ken Best in Choreography and Direction.
