Adda ti panagamak ni Mayor Kirk Caldwell iti Honolulu, Hawaii iti mapaspasungadan a panagsubli ti industriya ti turismo ituno Agosto.
Iti report ni Bombo International News Correspondent Manny Pascua iti Hawaii, adda ti panagamak ti mayor gapu ta agtultuloy ti panagngato ti kaso ti covid-19 iti lugar.
Segun ken ni Pascua, nakaimaldit ti pito a baro a kaso ti Hawaii iti napalabas a 24 nga oras.
Kuna na kaaduan kadagiti nagpostibo ket manipod iti Honolulu.
Gapu iti daytoy, addan 1,030 ti kabuklan a kaso ti covid-19 iti intero a Hawaii.
Kabayatanna, kuna ni Pascua nga a nu bilang matuloy ti panaglukat ti turismo intuno Agosto ket mapalubusan a sumrek iti lugar dagiti aggapo iti nagduduma nga estado ti Amerika.
Nu pay kasta, inbatad na a 72 nga oras sakbay a sumrek iti Hawaii ket kasapulan a mapan agpacheck-up.
Innayun na a nu mapaneknekan a saan a positibo iti covid-19 ti maysa a sumrek iti Hawaii ket mabalinen a saan a dumalan iti 14-day quarantine.
Maipalagip a ti turismo ti Hawaii ti maysa kadagiti nakaro a naapektaran gapu iti covid-19 pandemic.
