LAOAG CITY –Kinumpirmaran ni Mayor Albert Chua iti siudad ti Batac nga adda dagiti natakuatan a baboy a nagpositibo iti African Swine Fever iti paset ti Brgy. Camandingan iti nadakamat nga ili dua lawas ti napalabas.
Segun kenkuana, dagos a nangisayangkat dagiti ahensia blood testing iti uneg ti 500 meter radius ket adda dagiti baboy a nagpositibo a baboy.
Innayonna nga adda ti 20 a baboy ti naikali gapu iti nadakamat a sakit ken insigida a nangisayangkatda kadagiti preventive measures tapno malapdan ti panagwaras ti sakit.
Mainaig iti daytoy, nag negatibo idi kalman dagiti dadduma pay a blood test samples manipud kadagiti baboy iti nasao a lugar.
Kabayatanna, nagpalagip ti mayor a suruten dagiti pagannurutan dagiti ahensia tapno maliklikan ti pannakaiwaras ti nadakamat a sakit.
