LAOAG CITY – Inbatad ni Mayor James Bryan Alcid ditoy ciudad ti Laoag nga awan pay ti panagsasarita da iti pamilya Marcos maipanggep iti 2028 elections.
Kuna na nga iti agdama ket kayatna paylaeng a tutukan ti trabaho na kas mayor ditoy ciudad ti Laoag.
Inrakurak na a ti prayoridad na iti agdama ket ti mangipatungpal amin nga inkarina gapu ta kayatna nga agbalin a naragsak ken mapnek dagiti residente ditoy ciudad iti panagserbi na.
Innayon na a no panunuten nan ti 2028 elections ket amangan o saanen a makapagtrabaho a nasayaat.
Maipalagip nga immunan nga inadmitir ni Vice Governor Matthew Marcos-Manotoc a mapagsarsaritaanen ti pamilia da ti maipanggep iti 2028 elections.
Inlawlawag ti bise gobernador nga adayo pay ti eleksyon ngem alisto laeng ti panagtulid ti aldaw isut gapuna a nasken a planwen dan dagiti rumbeng nga aramiden ti pamilia da iti lubong ti pulitika.
