LAOAG CITY – Binisita nga insigida ni Mayor James Bryan Alcid dagiti naapektaran ti layos ditoy siudad ti Laoag gapu iti Bagyo Kiyapo.
Kunana nga insigida daytoy a nakikordinar kadagiti opisial ti barangay pata iti alisto a pannakaipaay dagiti relief operation kalpasan ti nasao a bagyo.
Inbatadna a malaksid kadagiti nalayos ket nakitana pay dagiti pagnaan ti danom kas kuma dagiti kanal ken kaadoan kadagiti drainage system ket naserraaan gapu iti kinaado ti basura partikular ti INLET drainage canal system ti General Segundo Avenue ken Rizal Street.
Kunana a dagiti basura ti gapuna a nagbarado dagiti nasao a drainage system no sadinno a nalayos ti kalkalsada ti sentro.
Gapu iti daytoy, insigida met a naikkat dagiti nasao a basura babaen iti panagtitinnulong dagiti enforcers, epleado, ken opisial manipud ti City Disaster Risk Reduction Management Council (CDRRRMC), Department of Public Safety (DPS), General Service Office (GSO), City Engineering Office (CEO), Buereau of Fire Protection (BFP), Philippine National Police (PNP), Liga ng mga Barangay, Coast Guards, Marines ken dadduma pay a volunteers manipud ti nagduduma nga ahensia ken non-government organizations.
Malaksid iti daytoy, inpakaammo ti Mayor a ti maysa kadagiti naapektaran ket ti Sitio 5 ti Barangay Barit no sadinno nga insigida ti pannakaiyuswat ti clearing operations no sadinno a nangipabulod met dagiti volunteer companies ti equipment ken nagduduma pay a ramit tapno saan a marigatan dagitui bumarangay a mangdalos kadagiti nadadael ti Bagyong Kiyapo.
Innayon pay ni Mayor Alcid a silulukat ti serbisio ti gobierno tapno mangipaay ti tulong kadagiti agkasapulan.
