LAOAG CITY – Minandar a dagus ni Mayor James Bryan Alcid iti Philippine National Police nga imbestigaren da ti viral video ni dati a Barangay Chairman Dan Toledanes iti Barangay 2 ditoy ciudad ti Laoag a pakabuyaan ti maipagarop a panangkabkabil na iti dua nga empleado na.
Inbatad ti mayor a naiget a kondenaren na ti inaramid ti dati a kapitan.
Nupay kasta, kuna ni Mayor Alcid a saan pay a masinunuo no kaanu a napasamak ti insidente, no ania ti rason no apay a maipagarop a kinabkabil ti dati a kapitan dagiti dua a saan pay a nabigbig nga empleado na.
Kuna ni Alcid nga ipaima na iti Philippine National Police ti pannakaimbestigar a naimbag ti napasamak ken saan a nasken a makiballaet no di ket iyuray na lattan ti written report manipod kadagiti otoridad tapno maamoan ti agbalin a duktal da.
Inlawlawag ti mayor a narigat a makibiang ti gobierno lokal ditoy ciudad aglalo ket maibilangen ni Toledanes kas maysa a private individual kalpasan a nagresign kas Barangay Chairman iti Brgy. 2 ditoy ciudad ti Laoag.
Inpakaammo ni Alcid a nga personal ti rason ti panagresign ni Toledanes iti kallabes ken saan a political.
