LAOAG CITY –Inlawlawag ni Mayor James Bryan Alcid ti rason no apay a saan a naaprobaran ti NAMCO wenno ti maysa nga akin kukua a ni Bokal Johanson Chua ti bidding ti panaggatang ti 80 nga RB Van ditoy siudad ti Laoag.
Kuna ti mayor a ti kangrunaan a rason ket gapo iti conflict of interest agsipud ta adda ti agdama a linteg a mangipawil kadagiti opisyal ti gobierno a makipartisipar kadagiti maisayangkat a government bidding.
Inyarig pay ni Alcid dagiti negosyo ti pamilya da a saan da a mabalin ti makipartisipar iti aniaman a government procurement wenno bidding iti laksid nga isuda ti kalakaan gapo ta“conflict of interest”.
Segun kenkuana, no mapili ti NAMCO ket pudno a makainot ti agarup P7-milyon ti lokal a gobierno ngem saanda a kuwalipikado gapu ta saan a nalukatan ti bid dagitoy.
Innayon pay ni Alcid a maibilang a “malicious” ti linaon ti surat manipod iti NAMCO gapo ta imbes a motion for reconsideration ti inpatulod na a surat iti Bids and Awards Committee ket dagiti met kameng ti konseho ti sinuratan da.
Maipalagip nga adda ti panangkwestionar ti nasao a Bokal iti babaen ti naipatulod a surat gapu ta saan a napili daytoy ngem basar iti Bids and Awards Committee nadiskualipikar ti NAMCO North Alliance Corporation iti technical eligibility basar iti sumagmamano a grounds kas ti saan a panangideklarar ti nasao a korporasion iti pakabuklan a listaan dagiti owner ken shareholders ti NAMCO kas nakailanad iti Section 81 ti Republic Act No. 12009 ken dadduma pay.
