LAOAG CITY – Kalikagum ni Mayor James Bryan Alcid ti panagbalin nga Smart City iti babaen ti nagduduma a programa ken proyekto a maiyuswat ditoy siudad ti Laoag.
Inbatad ti Mayor a daytoy ket nagbinnuligan ti Department of Science and Technology (DOST) Regional Office-1 ken Laoag City Government.
Inlawlawagna a ti umuna a katulagan ket ti Memorandum of Understanding maipanggep ti Project SARAI (Smarter Approaches to Reinvigorate Agriculture as an Industry in the Philippines).
Daytoy ket ti pannakaipaay dagiti baro a teknolohia no sadinno nga adadda a matulungan dagiti mannalon ken ti adadu nga apit, kinasagana, ken ti tignay kontra ti mapaspasaran a climate change.
Mainaig iti daytoy, ti maikadua a katulagan ket Memorandum of Agreement ti pannakaimplementar ti BIMMS (Barangay Information Management and Monitoring System) ditoy siudad.
Pakairamanan ditoyen ti Mobile Application Integration no sadinno a dakkel a tulong para iti alisto a pannakaipaay ti impormasion, datos, ken dadduma pay a kasapulan dagiti barangay.
Innayon ni Mayor Alcid ti panagyamanna iti Department of Science and Technology (DOST) Regional Office-1 gapu kadagiti programa ken proyekto nga ipapaayda iti siudad no sadinno a dakkel a tulong para kadagiti umili.
Kabayatanna, dagiti aktibidad ket inatendaran ti DOST iti babaen ti panangidaulo ni Regional Director Teresita Tabaog, Mayor James Bryan Alcid, department heads ken empelado ti City Government iti siudad.
