LAOAG CITY – Nagpalagip ni Mayor James Bryan Alcid kadagiti residente ditoy ciudad ti Laoag a saan nga agpuur iti aniaman a banag, karaman dagiti basura tapno maliklikan ti uram.
Inaramid daytoy ti mayor kalpasan a naduktalan ti Bureau of Fire Protection nga adda dagiti basura a nairanta a napuuran iti igid ti Padsan River iti paset ti Barangay 17 agingga iti Barangay Camanggaan ditoy ciudad ti Laoag.
Daytoy met ti nangitunda iti napasamak a nalawa nga uram iti igid ti Padsan River iti kallabes.
Inpalagip ni Mayor Alcid nga adda ti agdama nga ordinansa ditoy ciudad a maipawil ti panagpuur ken adda ti kaibatugan a multa dagiti maduktalan nga agpuur, ngem ado met latta dagiti agar-aramid iti daytoy.
Innayon ti mayor nga ado latta dagiti makaaramid nga agpuur gapu ta saan met amin a paset ti ciudad ket mabantayan dagiti opisyal ti barangay isut gapuna a kasapulan koma ti naan-anay a kooperasyon ken tulong dagiti residente.
