LAOAG CITY – Nakitaripnong ni Mayor James Bryan Alcid kadagiti nagduduma nga ahensia para iti baro a programa a maipaay kadagiti kutsero ditoy siudad ti Laoag.
Dagitoy ket pakairamanan dagiti ahensia manipud ti opisina ni House Majority Leader Congressman Ferdinand Alexander A. Marcos, miembro ti Department of Social Welfare and Development (DSWD) Sustainable Livelihood Program, Department of Labor and Employment (DOLE), Technical Education and Skills Development Authority (TESDA), ken ti Kalesa SLP Association ti Laoag City.
Kuna ni Mayor Alcid a ditoy da a napagsaritaan dagiti wagas ken baro a programa tapno mapadur-as pay dagiti kutsero ditoy siudad ti Laoag.
Kinunana a dakkel a tulong daytoy tapno magun-od dagiti ado a plano para iti sektor ti turismo partikular kadagiti kalesaan a masapul a ma-preserve.
Inpakaammona nga adalenda no ana pay dagiti wagas nga aramiden ken proyekto a mabalin a ma-implementar tapno ad-adda a mapapintas dagiti kutsero ken saan a mapukaw ti kultura dagiti kalesa nga isu ti agnanayon a mangbiag ti nabaknang a tradisyon ditoy siudad.
Kabayatanna, inpanamnama pay ti Mayor ti agnanayon a pannakaipaay ti suporta ti gobierno siudad iti babaen ti vission ken mission iti agdama nga administrasion.
