LAOAG CITY – Inbatad ni Mayor Jessie Galano iti Paoay, Ilocos Norte a respetaren da ti nagbalin a desisyon ti Korte Suprema seknan iti sangsangwen na a kaso.
Nupay kasta, masdaaw ni Galano gapu ta arigna kaipilpila da ti motion for certiorari ket addan a dagus ti desisyon ti kangatoan a korte.
Gapu ti daytoy, kuna ti mayor a saanna a maawatan no ti hustisya ket para laeng kadagiti babaknang wenno napapanglaw.
Inpalagip pay ni Galano a ti mangidadaulo ti dibisyon a nangipilaan da ti mosyon a ni Justice Antonio Carpio ket kabagyan ti kinalaban na a ni dati a Mayor Dolores Clemente, dati a Mayor Aileen Guerrero ken ti lumaban koma pay kenkuana iti kina-mayor a ni Lucas Carpio.
Inlawlawag na a saanna a kwestyunaran ti nagbalin a desisyon ti korte ngem patien na nga ammo dagiti maseknan ti mapaspasamak gapu ta sakbay pay a nagtugaw idi ket maipagarop nga ibagbaga dan nga awan pay ti tallo nga aldaw a pinagtugaw na ket maikkaten iti pwesto.
Nupay kasta, nagpanawagan kadagiti kailian na iti ili a Paoay nga agan-anus da agingga a malawlawagan ti sangsangwen na a kaso.
