LAOAG CITY – Maikkat a kas Mayor ti ili a Paoay ni Mayor Jessie Galano.
Daytoy ti linaon ti memorandum nga inserbi ti Regional Office ti DILG.
Segun kenni Atty. Lawrence Patrick Estiliore, ti nasao a memorandum ket aggapo kenni DILG Sec. Eduardo Año.
Inbatad na a saanen a mabalin nga agtugaw iti anyaman a posisyon iti gobierno ni Galano gapo iti kaso nga inpila ni dati a Mayor Dolores Clemente idiay Ombudsman.
Naamoan a ti memorandum ket napetsaan ti Hulyo 1, 2019 pakaseknan kadagiti Local Elective Officials a nagpaidasig, nangabak ken naiproklamar idi May 13 elections nga addaan iti kaso kas ken ni Galano.
Kabayatanna, inbatad ni Prov’l Local Gov’t Operations Officer Samuel Borja a nupay adda ti apela ni Galano iti Korte Suprema ket masapul a maipatungpal ti nasao a pammilin gapu ta awan met pay ti desisyon ti nasao a korte.
Gapo iti daytoy, babaen ti law of succession ket ni Vice Mayor Romulo Acdal ti agtugaw kas mayor iti nasao nga ili.
Kabayatanna, mamati ni Galano a magun-od na ti hustisya mainaig iti pannakadismis na iti pwesto kalpasan a naiserbi ti memorandum a nangdiskwalipikar kenkuana iti nasao a posisyon.
Segun kenni Galano, nakasagana a bumaba iti pwesto ngem saan na kayat na sawen a saan a lumaban agingga a malawlawagan ti nagan na.
Inbatad na a ti nasakit ket saan na manen a maipatungpal dagiti plano na para kadagiti kailyan na ti Paoay.
Nupay kasta, kuna ni Galano nga awan ti mapukaw kenkuana gapo ta ammo na a dakkel a makatulong kenkuana ni Vice Mayor Acdal nga agasumer kas acting mayor.
Ginutigot na dagiti kailyan na kangrunaan dagiti mangsupsuportar kenkuana nga agbalin a kalmado para iti natalna a pannakilaban na.
Inpetteng na a ti apela na ket adda pay laeng iti Korte Suprema ken awan pay ti pinal a desisyon.
Namunaganay ti kaso na gapo iti maipagarop a grave abuse of authority, gross neglect of duty, grave misconduct ken serious dishonesty over the falsification of travel documents a naipila idi 2015.
