LAOAG CITY – Inlawlawag ni Mayor Joseph De Lara iti ili ti Solsona iti alegasyon a maipapausar dagiti heavy equipment ti lokal a gobyerno kadagiti pribado a tattao.
Immuna iti daytoy, sinita ni Sangguniang Bayan Member Mark Dennis del Castillo da Roque Balino kenni Christopher Pascual agpada a driver ken operation ti dumptruck ken payloader ti munisipyo a napan nagideliver ti darat iti pribado a lote iti Sitio Lapaz, Brgy. Juan iti ili ti Solsona.
Segun kenni De Lara, kiniddaw ni Constancio Aguto, residente iti Brgy. Lapaz iti nasao nga ili, ti agtagikua ti pribado a lote a maideliveran daytoy ti maysa a load ti darat.
Daytoy ket kas sukat ti pannangtarimaan ni Aguto iti 10 wheeler truck ken payloder ti lokal a gobyerno.
Kunana a nasukatan met iti nausar a krudo ti truck.
Rumrumuar nga umabot iti agarup 40 a truck load ti naigabur iti pribado a lote idinto nga umabot ti 1,800 a pisos ti bayad iti kada truck load.
Inpetteng ni Aguto a maysa a truck load laeng iti naibutwag ken gimmatang pay daytoy ti 10 a load manipod iti dua nga aglako ti darat.
Inlawlawag ni Municipal engineer, Engr. Roselda Fajigal a 3 loads laeng ti maximum a maideliver.
Mainaig iti daytoy kunana nga awan ti bayad na no mausar dagiti heavy equipments nudiket masukatan laeng ti krudo na.
Malaksid kadagiti pribado nga indibidwal ket dagiti pay ahensya ti gobyerno iti nasao nga ili iti mabalin a madeliveran ti darat.
Innayon ni Fajigal a maiparit iti agideliver ti darat kadagiti pribado a tattao malaksid no adda iti request letter na iti opisina iti Mayor.
