LAOAG CITY – Inlawlawag ni Mayor Alexander Calucag ti ili a Solsona ti pudno a napasamak seknan ti bagas nga inpaay ni Senador Nancy Binay.
Inbatad ni Calucag a nagturong da iti opisina ti National Food Authority tapno damagen no napanan dagiti bagas a naiyalukar iti ili da gapo ta awan pay ti naibunong kadagiti maseknan nga umili.
Segun kenkuana, nagpadespensar ti NFA no apay nga inpalubos da a sabali ti mangala dagiti bagas uray no nasuratan ti Mayor.
Kuna ni Calucag a dagiti ibagbaga ni Bise Mayor Joseph De Lara nga isuna ti nakanagan ket saan nga agpayso gapo ta kumpleto ti mayor ti dokumento a mangipaneknek a mangipakita a nakanagan iti ili da ken sinuratan da daytoy.
Nupay kasta, kuna ti mayor nga uray siasinno kuma ti napan nangala laketdi dimmanon kuma kadagiti biktima ti bagyo Lawin.
Inbatad ni Asst. Provincial Manager iti National Food Authority (NFA) Elizabeth Dai a dagiti nakainagan kadagiti bagas ti rumbeng a mangala kadagiti bagas nga inpaay ni Senador Nancy Binay.
Daytoy ket gapo ta isu ti nakailanad iti notice a naggapo iti Central Office iti nasao nga ahensya.
Immuna iti daytoy, sinuratan ti Provincial Manager dagiti amin a mamayor a mangibagbaga nga adda ti maipaay kadakuada a bagas.
Naamoan a nakanagan ket ni Bise Mayor Joseph De Lara ken adda ti authorization letter a pinirmaan na a mangibagbaga a ti driver ken security na a ni Mr. Harold Gonzalez ti mangpick-up kadagiti nasao a bagas.
Inlawlawag ni Bise Mayor Joseph De Lara a manarimaan ti repacking kadagiti bagas a naawat ti Solsona manipud kenni Senador Nancy Binay para kadagiti biktima ti bagyo lawin.
Inbatad na a nakaawat daytoy ti surat manipud iti Sang. Bayan seknan ti nadakamat a bagas ket tinawagan na a dagus ni Bise Mayor Maja Sales ti Pagudpud, coordinator iti pannakaipaay ti tulong manipud kenni Senador Binay.
Inpetteng na nga isuna ti recipient ken tinawagan da a maikkan iti nasao nga ayuda.
Kunana nga idi biruken da no siasinno ti mapan mangala kadagiti bagas ket inbaon na ti driver na.
Segun kenni De Lara, saan laeng a dagiti biktima ti bagyo lawin ti maikkan no diket dagiti kangrunaan nga agkasapulan.
Daytoy ket gapo ta nabayagen ti nasao a bagyo ken saan na nga ammo ti pakakitaan ti listaan dagiti biktima.
Innayon na nga iti agdama ket addan dagiti sumagmamano a naikkan iti nasao a bagas.
