LAOAG CITY – Maalarma ni Mayor Michael Marcos Keon ditoy siudad ti Laoag iti nagsasaruno a gandat a panangserrek dagiti hackers iti faceboook account na.
Kuna ni Keon a nu pay saan pay a masinunuo ti adda iti likudan ti gandat nga hacking, nakita iti log-in history ti account na ket naruay a klase ti cellphones dagiti nausar.
Inpakaammo na nga umabot agingga iti innem a daras iti kada aldaw nga adda dagiti manggandat a mangserrek ti account na.
Inbatad na a malaksid iti account na ket adda pay ti naggandat a mangserrek iti account ti sumagmamano nga staff na.
Gapu iti daytoy, kalikagum ni Keon a maimbestigaran ti nasao a banag ken maduktalan ti adda iti likudan ti gandat nga hacking.
Patien met ti mayor a ti insidente ket maysa a pakdaar a masapol nga agannad.
