LAOAG CITY – Inlawlawag ni Mayor Michael Marcos Keon ti namunganayan ti komprontasion iti nagbaetanda ken ni Barangay Chairman Melencio Piñera ti Barangay 32-B, Lapaz ditoy siudad ti Laoag.
Segun kenkuana, sakbay a nagturong ti grupoda tapno agkampania iti nasao a barangay ket naggapuda pay iti Barangay Lagui-Sail ken Barangay Raraburan no sadinno a kinuyogda pay isuna dagiti maseknan a Kapitan kas kada Barangay Chairwoman Rodelyn Dela Cruz ken Barangay Chairman Elmer Maulit nga awan ti nagbalin a problema.
Inbatadna nga idi nakadanonda iti Barangay 32-B, Lapaz Torre ket adda ni Kapitan Piñera nga inbagana kadakuada a masapol nga adda isuna tapno mapagtalinaed ti Peace and Order.
Gapu iti daytoy, immasideg ni Mayor Keon ken ni Kapitan Piñera no ania ti kayatna a saoen ti inbagana a sarita.
Kunana a ditoy a nangrugi ti panagbinnarada iti nasao a Kapitan gapu ta nagbalin unay a nairot isuna kadakuada maidasig kadagiti agarup 20 a barangay ditoy siudad ti Laoag nga immunanan a nagkampaniaan.
Maipalagip a nagbinnara ni Mayor Keon ken ni Kapitan Piñera kabayatan a mangisaysayangkat ti panagkampania ti Mayor iti barangay ti Kapitan.
