LAOAG CITY – Inlawlawag ti Malakanyang nga agserbi kas adviser laeng ni Baguio City Mayor Benjamin Magalong ti Independent Commission for Infrastructure (ICI) ken saan nga isuna a miembro ti Komisyon.
Daytoy ti inrakurak ni Palace Press Officer USec. Claire Castro, nangruna ket inbatad ni Presidente Ferdinand Marcos Jr., nga awan ti pulitiko nga agbalin a paset iti binukel nga Independent Commission.
Kuna ni Castro a ti skills ken expertise ni Mayor Magalong a dati a Philippine National Police Criminal Investigation and Detection Group Director ti maysa kadagiti maikonkonsiderar tapno alaen daytoy kas special adviser.
Basar iti Palace Official, dakkel ti maitulong ni Magalong no ania dagiti ammona ken maala nga impormasion.
Naammoan a dagiti maalana nga impormasion ken datos ket mabalinna nga iburay iti Komision.
Mainaig iti daytoy, ti dua a miembro ti Komisyon nga isuda dati a Department of Public Works and Highways Sec. Rogelio Singson ken SVG Country Managing Partner Rossana Fajardo ket saan nga agpulpulitika rason a pinili isuda ni Presidente Ferdinand Marcos Jr.
Daytoy ket kagiddan iti saludsod no apay a saan a law enforcement officers ti innala tapno mangiwayat ti imbestigasion no sadinno a saan met a nagbalin a nalawag ti sungbat ti Palasyo.
