LAOAG CITY – Inlawlawag ni Mayor Remigio Medrano iti ili ti Sarrat a paset ti mitigation process ti pannakailockdown ti Barangay 7 iti laksid nga awan ti nagpositibo iti virus.
Inpetteng na a ti Sitio 1 iti Barangay 8 ket kaabay laeng ti Sitio 7 iti Barangay 7.
Inlawlawag na a basar iti impormasyon da, ti maysa kadagiti nagpositibo iti Barangay 8 ket adda ti negosyo na a water refilling station ken adda dagiti residente iti Barangay 7 a mapmapan gumatgatang iti pasdek.
Kabayatanna, agtultuloy ti naiget a contact tracing nga isaysayangkat ti lokal a gobierno iti ili ti Sarrat tapno madeterminar dagiti nakapulapol dagiti nagpositibo iti covid.
Segun kenni Mayor Remigio Medrano, amin a nakapulapol dagiti nagpositibo iti virus ket manamnama a dumalan iti swab testing.
Malaksid iti daytoy, adda pay ti maiyus-uswat pay ti random testing kadagiti nagduduma nga indibidwal pakairamanan dagiti opisyales partikular kadagiti barangay iti abagatan ti karayan.
Kuna ni Medrano a dumalan to met iti swab test ti asawa ni IN-C68 nga isu ti mangbanbantay kenkuana bayat ti kaadda na iti ospital.
Inbatad na a posible a pabaliwan da ti rekord ni IN-C68 iti Provincial Health Office gapo ta basar iti impormasyon a dimmanon kenkuana ket nakapulapol na ni IN-C36 ken dagiti dadduma pay a nagpositibo.
Ni IN-C36 ket ti baket a pimmusay gapo iti covid-19 itay laeng kallabes a taga Barangay 9 iti nasao nga ili.
Naamoan a ti Sitio ni IN-C68 ket kaabay laeng ti Sitio nga ummuna a nakaimalditan ti virus.
