LAOAG CITY – Inbatad ni Mayor Michael Marcos Keon ditoy ciudad ti Laoag nga awan ti sakit ti nakem na kadagiti empleado iti ciudad ken kakapitan a nangsuporta ken ni dati a Mayor Chevylle Fariñas iti napalabas nga eleksyon.
Nupay kasta, adda dagiti nasobraan na ti inar-aramid na ken daytoy ket saanna a nainkalintegan.
Inbatad na a kataripnong nanto dagiti amin nga opisyal ti barangay kangrunaan na dagiti kakapitan ditoy ciudad ti Laoag.
Innayon ni Keon nga ammo na nga ado dagiti kakapitan a nangsuporta idi iti dati a mayor ngem kuna na a nalpasen ti eleksyon ken saan a managimula ti sakit ti nakem.
Binigbig na met dagiti naaramidan ti pamilya Fariñas para ti pagsaayaatan dagiti umili.
Kuna na pay a dagiti program ken proyekto a nakabenepisyaran ti kaadoan ket itultuloy na ngem dagiti saan a nakatulong kadagiti umili ket rumbeng laeng a maisardeng.
Immapela pay ti baro a mayor ditoy ciudad a lipatenen ti aniaman a saan a pinagkikinnaawatan iti napalabas nga eleksyon ken ipamaysa dan ti agserbi para ditoy ciudad ti Laoag.
