LAOAG CITY – Inlawlawag ni Mayor Michael Marcos Keon ditoy ciudad ti Laoag no kasano a nagun-od ti ciudad ti pwesto a maika-13 a kababaknangan a ciudad iti intero a pagilyan.
Segun ken ni Mayor Keon, adda ti memorandum circular ti Commission on Audit a naiparuk-at idi 2015 a dagiti road network ket masapol a mainayon iti financial statement ti ciudad ngem saan a naararamid daytoy.
Idi tawen 2021-2022, babaen ti accounting officers, assessors, general staff officers, ken engineering officers ket nadeterminar dagiti local road network.
Basar iti datos nga inparuk-at ti local a gobierno ti ciudad ket addaan ti P20,971,175,384.87 a kabuklan nga assets.
Karaman kadagiti maibilang a current assets ket ti cash bank, inventories, ken receivables nga agdagop ti one billion pesos, bayat a ti not current assets kas kadagiti investments, properties, equipments ken biological assets ket agdagop ti P19 billion.
Kuna ti Mayor a dakkel ti tulong ti pannakainayon dagiti local road network idi 2021 a naiyalokar idi 2022 nga agbalor ti P18 billion wenno 88% total assets ti road lot ken concrete pavement.
Kabayatanna, inlawlawag met ni Ms. Loelyn Acain, officer-in-charge iti accounting office a dakdakkel kuma pay ti total asset ti ciudad nu ti nagbasaran ket ti Fair Market Value kompara ti Zonal Value.
Mainaig iti daytoy, sinungbatan met ni Dr. Marsha Lou Wafan ti mainaig iti isyu a sangsanguen ti Laoag City General Hospital, no sadinno a kabilang daytoy iti economic enterprises ti ciudad.
Inbatad na a dagiti sueldo dagiti health workers iti Laoag City General Hospitals ket aggapo ti mapaspastrekan ti nasao nga ospital kas iti nagduduma a funds pakairamanan ti Philhealth payments, congressional funds, PCSO medical fund, ken Municipal Health Office.
