LAOAG CITY – Patien ni Mayor Marcos Keon a pamerperdi laeng iti imahe na ken relasyon na iti pamilya na dagiti palso nga impormasyon mainaig iti nagduduma a banag a maipagarup nga irakrakurak na.
Iti panagsarita ni Mayor Keon iti press conference na itay bigat, inpetteng na a nu man pay adda dagiti sumagmamano a banag a saanda a panagkikinnaawatan ti pamilyada ket saan nga agaramid ti pakaperdianna.
Daytoy ket kas iti nagwaras iti naipost iti maysa a pagwarnakan a maipagarup nga statement na kontra kadagiti kasinsinna a ni Sen. Imee Marcos kenni presidential aspirant Bongbong Marcos.
Segun ken ni Mayor Keon, aniaman dagiti banag nga adda iti nagbaetanda nga agkakasinsin ket suportaran na latta.
Kuna na nga amin a rumrumuar maipanggep kenkuana ket pamerperdi laeng.
Kabayatanna, immunan nga inpasingked ni Mayor Keon a nu man pay ado dagiti mangperperdi kenkuana ket itultuloy na ti agserbi ditoy siudad.
Innayun na a saan a dakkel nga isyu kenkuana nu adda dagiti saan a mangayat kas mayor.
Nu pay kasta, inpetteng na nga iti kanito a maduktalan na a personal ti panangatake dagiti tattao kenkuana partikular dagiti opisyal ken adda iti babaen na ket sabali a saritaan daytoy ken posible a saanna a palabsen.
