LAOAG CITY – Nabara a sinarabo ni Mayor Michael Marcos-Keon ditoy ciudad ti Laoag dagiti 20 a police trainees iti Public Safety Field Training Program Phase II, Class 2024-01 iti Philippine National Police.
Daytoy ket naiwayat kabayatan ti panag-courtesy call dagiti police trainees iti Laoag City Hall.
Segun kenni Mayor Keon, dagiti nasao a police trainee ket binayabay dagiti field training officers.
Inbatad ti mayor a dagitoy a trainees ket temporaryo a naidesignar iti Laoag City Police Station nangrugi idi Hunyo 13 agingga iti Setyembre 5 ita a tawen kas paset ti patrol phase iti panagsanay da.
Kuna pay ti mayor a daytoy nga addang ket mangipaay kadagiti maseknan ti gundaway tapno iyaplikar dagiti nasursuro da iti classroom iti real-life scenarios ken tapno mairuwam da ti bagbagi da iti inaldaw a panagpatrolya ken dadduma a trabaho.
Innayon na a kalpasan ti tallo a bulan a panagsanay da, agsubli da iti Philippine National Police Regional Office I para iti debriefing ken pannakaideploy kadagiti nagduduma a paset ti rehiyon.
