LAOAG CITY – Kalikagum ni Mayor Michael Marcos Keon a maaddaan ti elevator iti Laoag City General Hospital.
Daytoy ti inpakaammo ti Mayor kagiddan iti pannakaselebrar iti 13 nga anibersario iti nasao nga ospital.
Inbatad ni Mayor Keon a mangrugi ita a tawen ti pannakaiyestablisar ti elevator nangruna ket addaan ti lima a kadsaaran ti nadakamat nga ospital.
Kunana a malaksid iti daytoy ket manarimaan pay ti pannakaaramid ti ceiling ti ospital.
Inlawlawagna a manamnama ti nayun pay nga ad-adu a pasilidad ken kagamitan a mausar para iti pannakadur-as ti ospital.
Mainaig iti daytoy, kuna ni Mayor Keon a gagemda mapapintas ti ospital ken in-inut a makita ti pagsayaatan dagiti pasiente pakairamanan dagiti agpapaay kas healthcare workers.
Innayonna a masapol a mai-upgrade ti ospital tapno napinpintas met laeng ti pannakaipadanon ti serbisio medikal para kadagiti umili.
