LAOAG CITY – Naglikos ni Mayor Michael Marcos Keon ken Vice Mayor Rey Carlos Fariñas kadagiti sumagmamano a barangay ditoy siudad ti Laoag a nakapasar ti nakaro a layos gapu iti iduduprak ti Bagyo Julian ditoy probinsia.
Segun ken ni Vice Mayor Fariñas, naruayen dagiti residente manipud kadagiti nagduduma a barangay ditoy siudad ti nagbakwit kadagiti evacuation center.
Inbatadna a dagiti maseknan a residente ket agnanaed iti nababa a paset ti lugar isu nga alisto a ngimmato ti lebel ti danom agingga a simrek kadagiti pagtaenganda.
Kunana nga adda ti uppat agingga lima a barangay ti nabisitada no sadinno nga pagat-tumeng agingga siket ti kaadalem ti layos a napasaranda.
Inlawlawagna a dagus a kontaken ti lokal a gobierno babaen iti City Disaster Risk Reduction and Management Council no adda dagiti kasapulan a maibakwit.
Mainaig iti daytoy, inpakaammo ti Bise Mayor nga adda metten ti naibunong a relief packs kadagiti maseknan a residente ken nangipaayda ti tulong pinansial tapno adda ti gastosen dagitoy.
Kabayatanna, naammoan a dagiti pamilia a nagibakwit ket manipud iti Brgy. 32-C Lapaz nga adda ti siam a pamilia, Brgy. 44 Zamboanga nga innem a pamilia, Brgy. 51 Nangalisan West nga uppat a pamilia, Brgy. San Guillermo a tallo a pamilia, Brgy. 45 Tangid a walo a pamilia, Brgy. 32-A Lapaz a 15 a pamilia ken dadduma pay.
