LAOAG CITY – Kwinestionaran ni Mayor Michael Marcos Keon no apay nga adda iti arig panang-harass-da iti panagkampaniana kadagiti nagduduma a barangay ditoy siudad ti Laoag.
Segun kenkuana, kadagiti immun-una a barangay a binisitana ket awan ti nagbalin a problema no apay nga idi kalman iti mismo barangay a pagnanaedanna ket adda ti maipagarup a saan a napintas a panangtrato dagiti kameng ti Philippine National Police iti grupona.
Inbatadna a kabayatan ti panagkampaniana iti Barangay Calayab ket adda dagiti residente a paunegenda isuna gapu iti kinabara ti panawen.
Inlawlawagna a kabayatan iti daytoy ket adda dagiti kameng ti Philippine National Police a mangaramat ti megaphone a mangirakurak ti No To Vote Buying.
Kunana a saanda nga inkaskaso daytoy ken apaman a rimmuarda ket ditoy a nakigtot gapu ta adda idiay ti Hepe ti Laoag City Police Station a ni P/Lt. Col. Andrew Rabang ken adda ti maipagarup a police personnel a mangibidbidyu kenkuana a rason no apay a na-trigger ken adda ti komprontasion a napasamak.
Kalpasan iti daytoy, intultuloyda ti panagkampania ngem apaman a nakadanonda iti sabali a paset ti barangay ket ditoy a naobserbaranda nga adda dagiti uppat a mobile police patrol, maysa ket manipud iti ili ti Bacarra, Ilocos Norte Police Provincial Office ken ti dadduma ket nakalinged ti ili a nakadesignaranda.
Segun iti Mayor, kabayatan ti panagtultuloy ti kampaniada ket adda dagiti indibidual nga umas-asideg kadakuada tapno ipakaammo nga adda dagiti kameng ti Philippine National Police a mapan umasideg kadakuada tapno damagen no ania ti inbagbaga ti Mayor ken no ania ti inted ti Mayor kadakuada.
Inpakaammo ni Keon nga ti indanon pay dagiti tricycle drivers iti nasao a barangay kenkuana nga adda ti pammutbuteng ni Barangay Chairman Marvelyn Padayao a no ikabilda ti tarpaulin-na ti tricycle-da ket ma-revoke ti franchise-da.
Inlawlawagna nga awan ti karbengan ti Kapitan a mang-block ti franchise iti maysa a tricycle ken ti Mayor ken Sangguniang Panlungsod laeng ti addaan ti kabaelan iti daytoy.
Kunana nga adda dagiti panagmonitor dagiti kapitan no asino ti ag-like ti post-na ket ilista dagiti opisial ti barangay ken ibilangdan a kalaban.
Kabayatanna, inlawlawagna a maipanggep iti security details-na ket inikkatda nga insigida ken apaman a naikkatda ket insigidada a naikabil ti rehion iti aldaw a mismo a pannakaikkatda.
Innayonna a masdaaw isuna gapu ta apaman a nag-request iti security details idi 2022 ket naaprobaran idinto nga apay ita a 2025 ket saan.
