LAOAG CITY – Nagreklamo ni Mayor Michael Marcos Keon ken ni Gov. Matthew Marcos Manotoc kalpasan a nasangpetan ti Laoag City Swimming Team ti swimming pool iti Ferdinand Edralin Marcos Stadium a narugit.
Segun kenkuana, adda ti katulaganda iti Provincial Sports and Development Office maipanggep iti iskedyul dagiti atleta a dumalan dagitoy iti panagsanay.
Nupay kasta, inpalgakna nga idi nadanon ti naikeddeng nga aldaw ket naipasungad kadagiti atleta, coaches ken pakairamanan dagiti nagannak ti narugit a swimming pool.
Gapu iti daytoy, kunana a nagreklamo isuna ken ni Gov. Manotoc no apay a narugit ti swimming pool iti mismo aldaw a napagtutulagan.
Inlawlawagna a gapu ta saanda a kayat a makaala ti sakit dagiti atleta ket saanen a nagtuloy a nagsanay dagiti umaayam.
Innayon ti Mayor a nakasarsaritana met ni Mr. Faivo Bartolome, Sports Consultant ti gobierno probinsial ngem naigetna a naglikudan a narugit ti swimming pool.
Iti baet daytoy, naminsan manen a nagkiddaw ti City Government iti Provincial Government para iti pannakausar ti swimming pool no sadinno nga inpasingked ni Mrs. Helen Rose Domingo, mangidadaulo ti Provincial Sports and Development Office a naplastar aminen.
Nupay kasta, idi madanon manen ti naikeddeng nga aldaw a mausarda ti swimming pool ket saan met a nakasagana daytoy a mausar para kadagiti atleta.
Kabayatanna, naammoan a nakigtot pay dagiti atleta a dumalan iti panagsanay iti Ferdinand Edralin Marcos Stadium para iti Region 1 Athletic Association idi singirenda ti sag-sangapulo a pisos banag a saanda nga inpakaammo daytoy kadakuada.
