LAOAG CITY – Nasakit ti nakem ni Mayor Michael Marcos Keon kalpasan ti nagbalin a rakurak ni Gov. Matthew Marcos Manotoc a maipagarup nga arig awan ti nagdur-asan ditoy siudad ti Laoag iti las-ud ti innem a tawen a panagtugawna kas Mayor.
Segun kenkuana, saan a rumbeng nga irakurak dagitoy a banag iti publiko nangruna no makadadael iti imahena kadagiti umili.
Inbatadna nga arig agsubsubli laeng ti dati a situasionda idi 2022 National and Local Elections ken no idasig ita a mapaspasangasangan manen ti eleksion.
Kunana a napilitan isuna a simmungbat kadagiti arig pammerperdi kenkuana ti kaanakanna gapu ta mamati daytoy a saan a nainkalintegan ti inaramid ti Gobernador.
Iti baet daytoy, inpannakkelna ti panagbalinna kas Number 1 Mayor iti intero a probinsia ken Number 2 iti intero a rehion uno a mangipaneknek ti panagdur-as ti siudad.
Maipalagip nga inrakurak ni Gov. Manotoc a maasian isuna kadagiti residente ditoy siudad ti Laoag gapu ta arig awan ti nagdur-asanna kabayatan ti panagserbi ni Mayor Keon.
