LAOAG CITY – Sinaludaran ni Mayor Michael Marcos Keon ti dedikasion dagiti barangay officials ditoy siudad ti Laoag a nakagun-od ti 2024 Lupong Tagapamayapa Incentives kas maibasar iti 2023 Assessment Figure.
Segun kenkuana, daytoy ti mangipaneknek iti kalikagum dagiti umili a mapagtalinaed ti linak, urnos ken talna kadagiti bukudda a barangay.
Inbatadna a babaen iti daytoy ket agtultuloy ti kinakappia ken napintas a pannakilangen-langen iti tunggal maysa.
Inlawlawagna nga eksakto ita nga aldaw ket nagbalin a siudad ti Laoag manipud iti maysa a munisipalidad addan ti 59 a tawen ti napalabas.
Kunana iti naglabas a sumurok-kumurang nga innem a dekada ket addan ti siam nga administrasion ti nagtugaw ken nagserbi kadagiti naruay nga umili.
Mainaig iti daytoy, inpannakkel ni Mayor Keon nga amin a naglabas nga administrasion ket adda ti naipaayna para iti pagsayaatan ken panagdur-as iti intero a siudad ti Laoag.
Inpasingkedna a dagiti sumarsaruno a mangidaulo ditoy siudad ket isu ti mangitultuloy ti narugian dagiti naglabas nga administrasion tapno maidanon met laeng ti napintas a serbisio para kadagiti amin nga umili.
Immuna iti daytoy, balligi ti naiyuswat a programa a pannakarambak iti maika-59 a tawen a Charter Day wenno ti panagbalin kas maysa a siudad ti Laoag.
