LAOAG CITY – Saan pay a nagparbeng ti pangta ti biag a maaw-awat ni Mayor Alex Calucag iti Solsona, Ilocos Norte babaen iti text message.
Daytoy ti kinumpirmaran ni Mayor Calucag iti Bombo Radyo.
Segun kenni Mayor Calucag, uray idi saan pay a Mayor ket adda latta ti pangta ti biag na.
Nupay kasta, kuna ti Mayor a kas iti gagangay ket balewala laeng kenkuana ngem adda ti kageddan a panagkararag ken naan-anay a panagannad.
Kunana a saan a maliklikan nga agamak ti Mayor nangruna no adda ti pagturongan na a pasken.
Innayun na a ti kangrunaan a kararag na ket malawlawagan ti panunot dagiti adda ti dakes a panggep kenkuana.
Maipalagip a natambang ti grupo ni Calucag idi agtakem pay laeng kas ABC President idi tawen 2015 a nakatayan ti police escort na a ni PO3 Rodante Julian.
