LAOAG CITY Makaunget ni Mayor Nicomedes Delacruz iti ili a Bacarra ti wagas a pannakatratar dagiti natiliwan a nagsusugal iti nasao nga ili a nakairamramanan ti asawa ni ABC Pres. Infante Reginaldo a ni Vilma Reginaldo.
Segun iti Mayor, insigida a kinasarita na ni P/C/Inps. Rodelio Santos Hepe ti Pulisya ti nasao nga ili kalpasan a naamwan na nga awan ti nagan ni Vilma kadagiti napilaan ti kaso.
Kuna na a palawag ni Santos no apay nga awan ti nagan ni Reginaldo kadagiti natiliw ket gapu ta informer daytoy.
Nagbalin a sungbat ti Mayor ken ni Santos ket no saan nga asawa ti pulitiko ti maysa kadagiti natiliw ket posible a saan a kastoy ti pannakatratar na.
Kalikaguaman ti Mayor a sulbaren ni santos ti nasao nga isyu.
Kabayatan na, inpetteng ni P/C/Inps. Rodelio Santos Hepe ti Pulisya ti ili ti Bacarra a sinurot da ti proseso iti panagipila ti reklamo kontra kadagiti natiliwan a nagsusugal iti Bgy. 18 iti nasao nga ili.
Kuna na nga awan ti pinaburan da no di ket no siasinno dagiti natiliw ken uray dagiti nagtaray ken uray ti agtagikua ti balay a nagsusugalan ket inpila da ti reklamo.
Kinuna ni Santos a no apay a saanda nga inraman a pinilaan ti kaso ni Mrs. Vilma Reginaldo nga asawa ni ABC Pres. Infante Reginaldo ket gapu ta awan iti ummong dagiti nagsusugal ngem ketdi adda iti maysa a kuwarto ti balay nga aged-edda.
Kuna na pay a no kagura da ti wagas a panangtrato da ti nasao a pasamak ket nakasagana a mangsango iti aniaman a mapasamak kas iti posible a panangrelibo da kenkuana.
