LAOAG CITY – Inlawlawag ni Mayor Rafael Benemerito no apay a saan a nairaman ti Local Government Unit iti ili ti Pagudpud kadagiti 2023 Good Financial Housekeeping (GFH) passers ditoy probinsya.
Segun iti mayor, dagiti transaksyon ket manipod iti 2021 agingga iti 2022 ngem naikabil iti 2023 gapu ta isu iti panangrebisar ti Commission on Audit (COA).
Inpalagip ni Benemerito nga idi 2021 ket isu iti panawen a saan a makaala ti majority votes iti konseho no sadinno a karigat ti panag-paaprobar na ti kasapulan iti umili.
Kuna na a naaprubaran na laengen dagiti kasapulan ti ili kalpasan ti eleksyon ken naigiddan met ti panag-resign ti accountant ti municipyo no sadinno nga adda ti innala da a baro nga accountant ngem saan nga inaprobaran ti konseho.
Gapu iti daytoy, inpetteng ni Benemerito a saan a makapag-function a naimbag ti Financial Department no awan dagiti kasapulan da a tao.
Iti baet daytoy, kuna ti mayor nga inkarigatan da ti bimmangon ken naaramid da amin dagiti kasapulan a maisumitir ngem ti laeng problema ket saan da a nakaabot iti deadline.
