LAOAG CITY – Mangnamnama ni Mayor Remigio Medrano iti ili ti Sarrat a mangrugin ti operasion ti Sarrat District Hospital inton bulan ti Setiembre.
Segun kenkuana, daytoy ket apaman a maiplastar amin dagiti kasapulan a pasilidad para iti naan-anay a pannakairugi ti pannakaipadanon ti serbisio medikal kadagiti pasiente.
Inbatadna a naikonektaren ti serbisio ti kuriente iti nasao a balay-pagagasan babaen iti naiget a pannakikoordinarda iti Ilocos Norte Electric Cooperative wenno INEC.
Malaksid iti daytoy, kuna ni Mayor Medrano nga iti agdama ket iyur-urayda laengen ti pannakaipadalan ti testing dagiti major equipment kas ti elevator, dagiti medical equipment kas ti X-ray machine ken dadduma pay.
Innayonna a babaen iti daytoy ket matulungan dagiti umili a maiyasideg kadakuada ti tulong medikal para iti pannakataripato ti salun-at ti tunggal maysa.
