LAOAG CITY – Nagpadispensar ni Mr. Erwin Suguitan, ti Municipal Tourism Officer iti ili ti Vintar kadagiti negatibo a komentona nga in-post-na iti social media mainaig iti Ilocos Sur Festival dance performance.
Mainaig iti daytoy, nadismaya ni Mayor Richard Degala iti ili ti Vintar gapu iti pannakai-tag ti facebook page ti Local Government Unit iti nasao nga ili ken facebook account-na.
Daytoy ket kalpasan a nagwaras ti post iti online ti maysa a concern citizen no sadino nailanad ditoy a saanna a nagustoan ti nagbalin a komento ni Mr. Suguitan iti naisayangkat nga Street Dancing Performances idiay probinsia ti Ilocos Sur.
Gapu iti daytoy, inbatad ni Mayor Degala a dagusna daytoy a pinaayaban tapno makasaritana ket mapagnunumoan dagiti banag a rumbengna nga aramiden.
Kunana a saan a mabalin ti kastoy nga aramid tapno saan a tuladen dagiti dadduma nga agpapaay iti lokal a gobierno nangruna ket maibilang dagitoy a public servant iti gobierno.
Kalikagumna a saan a madungritan ti imahe iti lokal a gobierno iti ili ti Vintar gapu iti napasamak rason a masapol ti madagdagus a tignay tapno masolbar daytoy a a banag.
Kabayatanna, indanon ni Mr. Suguitan ti panagpadispensarna kadagiti maseknan nga umili gapu iti linaon ti post-na iti online.
