LAOAG CITY – Positibo ti naiyuswat a search warrant operation iti Barangay 34, Isic-Isic iti ili ti Vintar babaen iti nagtipon a pwersa ti Philippine National Police, Special Action Force ken 1st Provincial Mobile Force Company iti Ilocos Norte Police Provincial Office.
Nabigbig ti subject ti operasyon a ni Edgar Barut y Acebo, agtawen ti 57, naasawaan, maysa a mannalon ken residente iti nadakamat a barangay.
Nailanad iti search warrant nga adda iti ikot ni Barut ti M14 rifle, 12 gauge shotgun, caliber 38 revolver ken balbala.
Naala met dagiti otoridad iti pagtaengan ni Barut ti maysa caliber 38 revolver ken 13 a pidaso ti bala na, maysa a 12 gauge shot gun ken 18 a pidaso a bala na, lima a pidaso a bala ti M14, maysa a black sling bag, maysa a rifle bag, maysa a white pouch ken maysa a black pouch.
Mainaig iti daytoy, saan met a naglikudan ni Barut nga adda iti ik-ikotan na a paltog ngem inpetteng na a dagitoy ket us-usaren na laeng a paganop iti bantay.
Segun kenni Barut, dagiti met bala ket maited kenkuana nga isu ti usaren na iti panaganop na iti alingo ken addan ti 20 a tawen nga ar-aramiden na daytoy.
Inlawlawag na a saan na met nga iyar-armar wenno ipappaputok ti paltog ken saan a makita dagiti kabarangayan na gapo ta rabii laeng met ti iruruwar na.
Inadmitir na nga ammo na a maiparit gapo ta awan ti dokumento dagiti ikot na a paltog rason nga isuksuksok na latta iti pagtaengan na.
Patien ni Barut nga apal ti rason no apay a naireport gapo ta maipagarop nga adda dagiti manggurgura kenkuana.
Kabayatanna, inlawlawag ni Police Captain Roi Manuel Ordonio, ti chief of police ti Philippine National Police iti ili ti Vintar nga adda ti nagreport kadakuada mainaig iti iduldulin ni Mr, Edgar Barut a paltog iti pagtaengan na.
Segun kenni Ordonio, no mapan aganop ni Barut ket maipagarop nga adda ti makakitkita kenkuana a naka-iggem ti sako a rumrumuar ket paltog ti karga na.
Inbatad na nga iti impormasyon da manipud iti barangay ket awan met dagiti gundaway nga us-usaren ti Barut ti paltog na a pagbutbuteng wenno iyar-armar.
Mainaig iti daytoy, kunana a ti nailanad iti search warrant nga M14 ti saan da a naala iti pannakaisayangkat ti operasyon.
Maisagsagana metten ti kaso a maipila kontra kenni Barut seknan iti panaglabsing na iti Republic Act 10591.
