LAOAG CITY – Pinalusposanen ti Philippine National Police iti ili ti Paoay ti maysa a babai gapu ta kurang dagiti ebidensya nga iggem ti pulisya iti sangsangwen na a kaso a robbery wenno extortion.
Binigbig ni P/Capt. Sygman Benigno ti hepe ti Philippine National Police iti ili ti Paoay ti suspek nga agtawen ti 21, babai, awanan asawa ken residente iti Barangay 25 Callagip, iti nasao nga ili, idinto a ti biktima ket agtawn ti 64, naasawaan, ken residente iti Brgy. 14 Sangladan iti isu met laeng nga ili.
Kuna ni Benigno a nu pay napalusposanen ti suspek ket mangipila da iti motion for reconsideration tapno mapilaan latta ti kaso ti suspek.
Maipalagip nga iti entrapment operation nga inwayat dagiti otoridad iti mismo pagtaengan na ket ditoy a naduktalan ti aramid na no sadinno nga insigida met nga inarestar isuna dagiti otoridad.
Immuna iti daytoy ket nagturong ti biktima na iti stasyon da ken inreport na a namin-adun a daras nga inikkan na ti suspek iti kwarta nga agdagup iti sumuruk-kumurang dua a milyon a pisos.
Malaksid pay iti daytoy ket naminsan manen nag-demand ti suspek ti kwarta nga agdagup iti 30,000 a pisos iti biktima ket no saan na a maited daytoy ket pinangtaan na a papatayen na ti biktima.
