LAOAG CITY – Nagkamang iti Bombo Radyo Laoag ti maysa a babai a residente iti Brgy. 40-Balatong ditoy siudad ti Laoag.
Daytoy ket tapno dumawat ti tulong gapu iti maipagarup a pannakdangran na babaen iti live-in partner na a ni Mr. Romeo Piedad.
Basar iti palawag ti nagpabigbig a Mrs. Vina, kuna na a naturog ngem nakariing gapu iti napigsa a pannakatugtog ti ridaw da.
Kuna na a napan na linukatan ket dita a naklaat gapu iti kellaat a panangpang-or kenkuana ti live-in parter na ti kawayan rason a nasugatan ti muging na.
Inbatad ni Mrs. Vina a kalpasan ti pannakapang-or na ket nagpaarayat kenni Barangay Kagawad Sandy del Cruz ngem saan na a rinipar ken maipagarup nga inbaga na laeng nga agtalaw daytoy ken kanunungan na ti live-in partner na.
Gapu iti daytoy, inpakaamo na a napan iti asideg nga store ket dita a dimmawat ti tulong ken adda met ti dagus a nangidiaya kenkuana nga agturong ditoy Bombo Radyo tapno agreklamo.
Mainaig iti daytoy, inbunannag ni Mrs. Vina a masansan ti panangdangran kenkuana ti live-in partner na nangruna nu adda iti impluwensya ti nasanger.
Innayun na a desidido nga agipila ti reklamo kontra iti live-in na.
Kabayatanna, inpetteng ni Brgy. Kagawad Sandy dela Cruz iti Brgy. 40-Balatong ditoy siudad ti Laoag a rinipar na ti napasamak ken ni Mrs. Dina ken ti live in partner na.
Segun ken ni dela Cruz, dagus a nagturong iti pagtaengan dagiti aglive-in partner kalpasan nga intawag kenkuana ti kapitan.
Kuna na a dita a nadanunan na nga agsinsinnungbat dagiti maseknan ken nakita nga adda ti sugat ni Mrs. Vina.
Gapu iti daytoy, pinadas na ti nagtawag iti pulis ngem maipagarup a busy ti linya.
Nu pay kasta, inbunannag ni dela Cruz a binalakadan na ni Mrs. Vina nga agasan na pay laeng ti sugat na ngem dita a maipagarup a pinagsawsaw-an na ken inbaga ti “Ang mga police patola walang silbi, pati mga barangay officials.”
Kabayatanna, inbatad ni dela Cruz a saan dayta ti umuna a gundaway nga agriri dagiti agasawa agsipod ta arigna kada rabii nga agsinnungbat dagitoy.
Inbunannag na pay a ti panagbartek ti babai ti patien na a pagriririan da nga aglive-in partner.
Innayun na a kalikagum pay dagiti kalugaran da nga agtalaw da iti lugar gapu ta kanayun da a makariribok nangruna iti rabii.
Kabayatanna, manarimaan ti imbestigasyon dagiti otoridad seknan iti nasao nga insidente.
