LAOAG CITY – Desidido a mangipila ti reklamo ni Ms. Jackie Justo, agdama nga agnanaed ditoy ciudad ti Laoag kontra iti kasinsin na a maipagarop a nangtungpa-tungpa kenkuana.
Segun kenni Justo, nagturong isuna iti Barangay Ferdinand iti ili ti Marcos idi Pebrero 6 ken ditoy ti nakapasamakan daytoy.
Inlawlawag na nga idi nalpas ti panagsarsarita da iti kasinsin na a ni Rodel Abrigado ket maipagarop nga inbaga ti maseknan nga agbagtit isuna rason a pinagsaw-an na met.
Kunana a ditoy metten a maipagarop a tinungpa-tungpa ni Abrigado ni Justo iti rupa pakairamananen ti ulo na.
Gapo iti daytoy, inbatad na a napan barangay hall iti Barangay Ferdinand ngem awan ti nadanon na isut gapo na a napan iti balay ti kapitan ngem ti asawa laeng ti opisyal ti nadanon na.
Kunana nga idi nauray na ti kapitan ket inbaga na ti gagem na ken inbaga ti kapitan kenkuana nga agsasarita da iti alas-sais ngem saan na nga inpalubos agingga nagkuyog da iti opisyal a napan iti ayan da.
Inbatad na pay a no kasta nga oras ti panagsasarita da ket mabuteng nangruna ket maipagarop a nasipnget ti dalan na.
Inpetteng na a maipagarop a saan a trinatar ti barangay ti reklamo na iti laksid ti panangidanon na ti sitwasyon na.
Kabayatanna, inlawlawag met ni Barangay Captain Ranel Magno iti nadakamat a barangay nga inaksyonan na a dagus daytoy gapo ta inkeddeng na ti oras ti alas-sais a panagsasarita da gapo ta adda ti pakakumikuman da iti barangay.
Basar pay iti kapitan, saan a pudno a nasipnget ti dalan gapo ta mayat met amin nga street lights ken asideg met ti pagtaengan ti sector kagawad.
Mainaig iti daytoy, kunana nga inadmitir ni Abrigado a tinungpa-tungpa na ni Justo rason a naikeddeng ti panagsasarita da ngem saan a napan ti maseknan.
Kunana nga iti kabigatan na ket adda ti hearing na ken bayat nga adda iti ili ti Dingras ket timmawag kenkuana ti Pulisya a mangipakpakammo nga adda ni Justo iti kwerpo ti pulisya.
Kalpasan daytoy, inbatad na a saan metten a nagpakpakita ni Justo kadakuada.
