LAOAG CITY – Natiliw ti maysa a babai kalpasan a maipagarop a nagtakaw iti pagpapaayan na a balay iti Barangay Cali iti ili ti Dingras.
Ti suspek ket agtawen ti 30, taga ciudad ti Laoag ngem agdama nga agnanaed iti Barangay Daquioag iti ili ti Marcos.
Basar iti report, naglako ti irik dagiti amo ti suspek ken umabot iti 60 ribo a pisos ti naglakoan da ken inpan da iti kwarto da nga agasawa.
Nupay kasta, idi napan innala ti suspek ti mureng dagiti amo da ket dita a nakita na ti kwarta.
Rumrumuar a nakita ti maysa a pada na met laeng a trabahador ti panangala ti suspek ti kwarta no sadinno a dinamag na no apay nga alaen na ngem insungbat ti babai a papaala ti amo da a babai.
Gapu iti daytoy, saanen a nagsao pay ti maseknan ngem nagbalaw laengen dagiti agasawa nga amo da idi saan dan a makita ti naglakoan da ti irik.
Naamoan a pimmanaw ti suspek iti balay a pagpapaayan na ngem iti pannakatiliw na ket inadmitir na nga innala na ti nasao a kwarta ken pinagbayad na ti utang na ti dadduma isut gapuna a 29 a ribo a pisos laengen ti nabati.
Gapu iti inaramid ti suspek ket pursigido dagiti amo na nga agpila ti reklamo a theft kontra kenkuana.
