LAOAG CITY – Nagballigi dagiti otoridad a nangarestar iti maysa a babai iti insayangkat da a search operation iti Brgy. Poblacion 2 iti ili ti Currimao.
Segun ken ni Police Capt. Melvin Soriano, ti chief of police iti ili ti Currimao, ti subject ti search operation ket maysa a babai, agtawen ti 42, naasawaan, drug surenderree, maibilang kas Street Level Individual, taga Santiago, Ilocos Sur ngem naikamang iti nadakamat a barangay.
Inbatad na a naarestar ti suspek babaen ti bileg ti search warrant gapu iti panaglabsing ti Republic Act 9165 wenno Comprehensive Dangerous Drug Act of 2002 .
Inpakaammo ni Soriano a nakakumpiskar dagiti otoridad iti balay ti suspek ti sumuruk-kumurang a 10 a gramo ti maatap a shabu ken mapatta-patta nga agbalor ti 68 a ribo a pisos ken dadduma pay a drug paraphernalia.
Mainaig iti daytoy, inlawlawag ni Soriano a sakbay nga insayangkatan da ti operasyon ti suspek ket adda dagiti report nga ado dagiti tattao a baro a rupa nga agturturong iti balayda.
Innayon na nga iti panag-validate da ket napaneknekan da a ti suspek ket agik-ikot ken aglaklako ti illegal a droga.
Kabayatanna, inpetteng ni Soriano nga awan ti kinapudno na ti alegasyon ti suspek nga adda ti immuna a simrek iti balayda sakbay ti pormal a panangisayangkat da ti operasyon.
Inpaganetget na nga inuray da a naglawag ken nakasuot dagiti otoridad ti body-worn camera tapno maipasigurado a lehitimo ti operasyon da.
