LAOAG CITY – Nasapgud ti maysa a babai iti motorsiklo kabayatan iti panagdalyasat na iti kalsada iti paset ti Barangay 27 ditoy siudad ti Laoag.
Binigbig ni PSSgt. Alexson Rosal, Duty Investigator ti Philippine National Police – Laoag Traffic Division ti biktima nga agtawen ti 22, balasang idinto a ti nangiturong iti Honda click nga agmaris ti asul ket agtawen ti 18, awanan ti asawa ken agpada dagitoy a residente iti nasao a barangay.
Segun kenni Rosal, kababbaba ti biktima manipod iti tricycle ken apaman a dumalyasat iti kalsada ket ditoyen a nasapgud ti nakamotorsiklo nga agpa-amianan.
Inbatad ni Rosal a gapu iti napasamak ket nagpasar ti sugat iti ulo ken gasgas iti nagduduma a paset ti biktima idinto a ti driver ti motorsiklo ket saan a naan-ano.
Naitaray a dagus ti biktima iti Governor Roque Ablan Senior Memorial Hospital para iti naan-anay a pannakataming na.
Kuna pay ni Rosal a manamnama a maipaayan ti citation ticket ti driver ti motorsiklo gapo ta naamoan da nga awan ti driver’s license ken awan helmet na idi napasamak ti insidente.
Iti agdama, adda iti kustodyar ti pulisya ti motorsiklo ken mai-release laeng kalpasan a makarwar iti ospital ti biktima ken masolbar ti napasamak babaen kadagiti naggannak dagiti maseknan.
