LAOAG CITY – Natay ti maysa a babai kalpasan a napalto-paltogan iti pagtaenganda iti Brgy. 43, Cavit ditoy siudad ti Laoag.
Daytoy ket basar iti impormasion ti Philippine National Police ditoy siudad.
Immunan nga inbatad ni Brgy. Chairman Jerry Alonzo iti nadakamat a Barangay a ti biktima ket nabigbig a ni Josephine Rara, agtawen ti 43 ken residente met laeng iti nasao a Barangay.
Kunana nga adda ti tallo a putok ti paltog ti nangngegna ngem basar iti pannakisarsaritana kadagiti kabarangayanna ket nasursurok pay ngem tallo a putok ti paltog ti nangngegda.
Inlawlawagna nga isuna mismo ti nangitaray ti biktima iti Laoag City General Hospital ngem saan a nagbayag ket pimmusay met laeng daytoy kabayatan ti pannakatamingna.
Nupay kasta, inpalgak ni Kapitan Alonzo a saanna a masinunuo no ania a paset iti bagi ti biktima ti natamaan iti bala ti paltog.
Innayonna a nasayaat ken awan met ti nakairamramanan ti nasao a biktima iti Barangayda.
Kabayatanna, bayat a maisursurat daytoy a damag ket agtultuloy ti isaysayangkat nga imbestigasion dagiti otoridad ti pakabigbigan dagiti suspek nga adda iti likudan ti napasamak nga insidente.
